Дар солҳои 2022, 2023 ва 2024 шаҳри Душанбе мизбони се давраи пайдарпайи Ниммарафони байналмилалӣ — XII, XIII ва XIV гардид. Чорабиниҳои мазкур ба муносибати Рӯзи пойтахт баргузор шуда, варзишгарони касбӣ, намояндагони кишварҳои хориҷӣ ва дӯстдорони варзиши сабукро ба ҳам оварданд.
Мусобиқаҳо мутаносибан 16 апрели соли 2022, 15 апрели соли 2023 ва 20 апрели соли 2024 баргузор гардида, ба рушди варзиши сабук, тарғиби тарзи ҳаёти солим ва муаррифии Душанбе ҳамчун макони баргузории чорабиниҳои байналмилалии варзишӣ мусоидат намуданд.
Нақши дастаи мо
Дар доираи баргузории ин се чорабинӣ гурӯҳи волонтёр-тарҷумонон таҳти роҳбарӣ ва ҳамоҳангсозии Додхудо Шарифзода дар корҳои ташкилӣ, қабулу гусели меҳмонон, роҳбаладии ҳайатҳои хориҷӣ, пешниҳоди хизматрасонии иттилоотӣ ва ҳамоҳангсозии ҳаракати иштирокчиён фаъолият намуд.
Иштирок дар се давраи пайдарпайи Ниммарафони байналмилалии Душанбе ба даста имконият фароҳам овард, ки таҷрибаи худро дар самти хизматрасонӣ ба иштирокчиёни хориҷӣ, идоракунии гурӯҳҳои волонтёрӣ ва ҳамоҳангсозии чорабиниҳои оммавии варзишӣ тақвият бахшад.
Ин таҷриба яке аз самтҳои фаъолияти амалии дастаи мо дар баргузории чорабиниҳои сатҳи шаҳрӣ ва байналмилалӣ ба ҳисоб меравад.